Gilimod sa Ministry of Foreign Affairs sa China nga adunay kalambigitan ang ilang gobyerno sa AI-generated video nga gipagawas sa usa ka state-run media outlet nga naghulagway sa mga Pilipino isip mga unggoy samtang gisaway ang 2016 Arbitral Award sa West Philippine Sea (WPS).
Matud ni Chinese Foreign Ministry spokesperson Lin Jian, wala siyay ikomento bahin sa maong video ug gipasabot nga dili kini gihimo sa gobyerno sa China.
Bisan pa niini, gisubli sa Minister ang dugay nang baruganan sa Beijing nga dili niini ilhon ang 2016 South China Sea arbitral ruling, nga giingong ilegal ug walay bisa.
Samtang, nagpadayon ang Pilipinas sa pagbarug sa legal nga kusog sa maong desisyon nga nag-ingon nga walay ligal nga basehan ang halapad nga pag-angkon sa China sa gihisgutan nga kadagatan.
Una nang gihangyo sa Department of Foreign Affairs (DFA) ang state-run media outlet nga tangtangon ang AI-generated video gikan sa social media.
Gihulagway sa DFA ang maong video nga racist, makainsulto, ug nagpaubos sa dignidad sa mga Pilipino.
