Wala pa makahinabi ang House prosecution panel kang National Bureau of Investigation o NBI Director Melvin Matibag kabahin sa iyang pahayag nga imbestigahan sa iyang opisina ang nahimong pag-host sa Pilipinas sa 2019 Southeast Asian Games.
Kini human mahimong kontrobersyal ang maong pahayag ug gisupak nila Sen. Pia Cayetano ug Sen. Alan Peter Cayetano, nga miingon nga daw usa kini ka porma sa pagpanghadlok sa dili pa ang gikatakdang pagtambong ni Matibag sa Senate impeachment court sa sunod semana.
Sa eksklusibong interbyu sa Bombo Radyo Philippines, gipasabot ni House panel member ug Iloilo Rep. Lorenz Defensor nga bisan pa og apil si Matibag sa listahan sa mga testigo sa prosecution panel, wala kini nila hilabti sa iyang katungdanan isip director sa NBI.
Matud ni Defensor, wala usab nila gihisgutan uban sa opisyal ang mga imbestigasyon sa NBI kalabot sa nagkalain-laing krimen ug mga alegasyon sa korapsyon.
Hinuon, nakapokus lamang ang prosecution panel sa papel sa NBI sa imbestigasyon sa giingong hulga ni Vice President Sara Duterte niadtong Nobyembre 2024 ug sa resulta sa maong imbestigasyon.
Si Rep. Defensor ang lead prosecutor sa Article IV sa impeachment complaint batok kang Vice President Sara Duterte.
Sa laing pahayag, giingon ni Director Matibag nga wala niya isalikway ang posibilidad nga mahimong ma-cite in contempt sa iyang pagtambong sa Senate impeachment court. Matud pa niini, adunay siya’y kabalak-an nga mahimong ma-contempt sa korte, ilabina human sa mga pahayag nila Sen. Pia Cayetano ug Sen. Alan Peter Cayetano atol sa miaging pagtaral.
