Gipasalig sa Philippine National Police nga tumanon niini ang mando sa korte nga ipresentar si kanhing DPWH Sec. Manuel Bonoan sa Sandiganbayan karong adlawa, Agosto 12, alang sa iyang testimonya sa corruption trial ni kanhing Sen. Ramon “Bong” Revilla Jr.
Kagahapon, Agosto 11, gimando ni PNP Chief PGen. Jose Melencio Nartatez Jr. ang PNP Health Service nga makigkoordinar sa anti-graft court aron masiguro ang pagdala kang Bonoan samtang padayon nga bantayan ang iyang kahimtang sa panglawas.
Giisyu sa Third Division sa Sandiganbayan niadtong Agosto 7 ang subpoena alang sa 80-anyos nga kanhing DPWH chief aron motestigo kabahin sa giingong P92.8-million ghost flood control project sa Pandi, Bulacan.
Giserbisyuhan si Bonoan sa subpoena sulod sa PNP General Hospital diin nagpabilin siyang ubos sa medical custody tungod sa diabetes, chronic kidney disease ug hypertension.
Matud ni Nartatez, ubanan si Bonoan sa medical staff ug security personnel paingon sa korte aron masiguro ang iyang kaluwasan ug matubag dayon ang iyang medical needs atol sa proceedings. | VIA BOMBO EROS PAJOTA
