DAVAO CITY – Tungod sa nasinatiang pag-ulan kagabii gumikan sa epekto ni bagyong dante, pipila ka mga bahin sa syudad ang gibaha. Gipabakwit sab ang mga residente nga ninumuyo duol sa mga sapa sama sa Bunawan River, ug Talomo River nga anaa sa critical level kagabii ug gani nilapaw ang tubig sa kalsada sa bahin sa Brgy. 6 Benedict Heights Tugbok Davo City tungod sa kusog nga bundak sa ulan.
Samtang gipabakwit sa mintal gym ang 30 ka mga indibidwal tungod sa pagbaha sa Purok 15 sa maong dapit, ug nag set-up sab kagabii og modular tents ang SK, Brgy. Council ug BDRRMC sa Mintal alang sa naapektuhan sa baha aron nga adunay masilungan ug katulgan ang mga residente.
Apektado sab sa pagbaha ang uban nga parte sa kadalanan sa Purok 20 Newloon.
Hinuon human ang pag-ubos sa tubig baha, hinay-hinay sab dayon nga mibalik sa ilang pinuy-anan ang mga residente.
Okapado sab ang pipila ka mga pamilya sa pagpanglimpiyo sa ilang pinuy-anan human nga gisulod kini sa tubig baha.
Una na sab nga nagpahimangno si City disaster Risk Reduction and Management Office (CDRRMO) head Alfredo Baluran nga kanunay mag-igmat aron nga dili mabutang sa risgo sa kinabuhi ilabi na sa mga nanimuyo sa landslide ug low lying areas.
