Subling ipailawom sa maximum security zone and pipila ka mga parte sa Dakbayan sa Dabaw alang sa kasaulogan sa ika 37 Kadayawan nga dagsaon og mga tawo arun masiguro ang kalinaw ug luwas kini gikan sa bisan unsa nga hulga sa seguridad.
Sa session sa City Council, ipatuman kini ilabi na adunay mga dagkong aktibidad nga di malikayan nga dugukon og tawo lakip na ang residente sa Dakbayan ug mga turista gikan sa laing bahin sa nasud. Ang mga parte nga buot ipailawon sa maximum security zone gilangkuban sa checkpoints, terminal, airport, port, Roxas Night Market, ug mga parke.
Samtang, gi-awhag sab ang publiko nga ug pananglitan adunay makita, gilayon nga ireport kini o batasanon ang culture of security arun hinanaling ma-respondehan sa mga awtoridad. Apan, saysay ni Councilor Luna Acosta, dili i-deklara nga maximum security zone ang mga nahisgutang lugar pirmi apan ipatuman lamang kini atol sa pagpahigayon sa aktibidad.
