DAVAO CITY – Negatibo sa Covid-19 ang nahimong resulta sa swab test sa mga empleyado sa Land Transportation Franchising and Regulatory Board (LTFRB-11) bisan nga usa sa ilang mga kaubanan ang natakdan sa kagaw.
Kahinumduman nga naka-lockdown karon sa buhatan tungod sa ipahigayon nga disinfection human nga usa sa ilang empleyado ang nagpositibo sa Covid-19.
Sumala pa kang Mizarah Salcedo-Arraz, OIC regional director sa LTFRB-11, nga naglain matud pa ang pamati sa ilang kaubanan hinungdan nga gitambagan kini nga magpa-check up hangtud nga migula ang resulta nga nagpositibo kini sa kagaw.
Hinuon gipasalig ni Arraz nga dili maapektohan ang operasyon sa ilang buhatan diin mamahimo pa gihapon nga makapahigayon ug transaksiyon pinaagi sa online.
Gani, mamahimo sumala pa nga ipadala sa ilang website nga r11.ltfrb.gov.ph kung adunay mga concern o buot nga ipanguta sa ilang buhatan.
