Gipaklaro sa Philippine Postal Corporation (PHLPost) nga dili na kinahanglan ang laing balidong government-issued ID aron maka-apply og Postal ID.
Matud ni Postmaster General and Chief Executive Officer Maximo C. Sta. Maria III, mahimo nang makakuha og Postal ID basta magdala og birth certificate, barangay certificate, ug proof of address sama sa bill sa kuryente, tubig, o internet, basta nakapangalan kini sa aplikante.
Tumong niini nga matul-id ang sayop nga pagsabot nga kinahanglan una nga adunay laing government-issued ID ang usa ka aplikante sa dili pa makakuha og Postal ID.
Dugang pa ni Sta. Maria, ang Postal ID gihimo aron magsilbing unang government-issued identification sa mga Pilipino ug aron mapasayon ang pagpamatuod sa ilang pagkatawo.
“The Postal ID has always been intended to make it easier for Filipinos to establish their identity, especially those applying for their first government-issued ID,” matud ni Sta. Maria.
Ang Postal ID gidawat sa daghang transaksyon sa pampubliko ug pribadong sektor, lakip ang pag-abli og bank account, pag-apply og pasaporte, pagkuha og mga parsela, ug uban pang legal ug pinansyal nga transaksyon.
