Nagpasidaan ang Philippine Institute of Volcanology and Seismology (PHIVOLCS) sa posibleng sea level disturbance human sa magnitude 6.5 nga linog nga miigo sa karagatan duol sa Balut Island, Davao Occidental.
Matod sa PHIVOLCS, posible nga makasinati og pagtaas sa balod nga ubos sa usa ka metro kumpara sa kasagarang lebel sa tubig. Posible usab nga mas taas ang balod sa mga enclosed bays ug enclosed straits.
Gipahimangnoan sa PHIVOLCS ang publiko nga magpabiling alerto sa bisan unsang dili kasagarang pagtaas sa balod ug likayan una ang mga baybayon sa mosunod nga mga lugar:
• Sarangani
• Davao Occidental
• General Santos City
Gipasidaanan usab ang mga tag-iya sa bangka nga anaa sa pantalan, suba, o mabaw nga bahin sa dagat nga siguruhong luwas ang ilang mga sakayan ug mopahilayo una sa baybayon.
Giklaro sa PHIVOLCS nga wala pa kini nagpagawas og evacuation order may kalabotan sa sea level disturbance.
