Gikustodiyahan sa Philippine Coast Guard (PCG) ang usa ka gituohang rocket debris nga nakit-an sa daplin sa baybayon sa Barangay Babuyan Claro, Calayan, Cagayan niadtong Agosto 6, samtang naghulat pa kini sa teknikal nga pagsusi sa mga hingtungdang awtoridad.
Sumala sa PCG, unang narekober sa mga personnel sa Philippine Navy CAFGU ang maong butang. Apan, sa pagkakaron, wala pa’y opisyal nga kumpirmasyon nga rocket debris gayod kini tungod kay padayon pa ang beripikasyon sa mga eksperto.
Dugang pa niini, gibalhin ang maong butang ngadto sa luwas nga dapit aron malikayan ang posibleng peligro sa publiko ug masiguro ang hustong pagdumala sa imbestigasyon.
Samtang, gipahimangnoan sa PCG ang mga mangingisda ug mga residente sa kabaybayonan nga dili hikapon o kuhaon ang mga dili mailhing butang nga ilang makita, hinunoa ipahibalo dayon kini sa labing duol nga mga awtoridad alang sa angayng aksyon.
