Nakompleto sa Pilipinas, Estados Unidos ug Australia ang usa ka semana nga maritime activity sa West Philippine Sea aron mapalig-on ang kooperasyon ug koordinasyon sa ilang mga armadong pwersa.
Sumala sa Armed Forces of the Philippines, gipahigayon ang ika-19 nga Multilateral Maritime Cooperative Activity gikan Agosto 19 hangtod 25 pinaagi sa serye sa maritime ug air operations.
Lakip sa mga gihimong ehersisyo ang communications exercises, maritime domain awareness, anti-submarine warfare, replenishment at sea, division tactics, officer of the watch maneuvers, photo exercise ug fly-by operations.
Gipadala sa Pilipinas ang BRP Diego Silang, AW109 helicopter, FA-50 fighter aircraft, C-208B aircraft ug Sokol search-and-rescue helicopter. Miapil usab ang Philippine Coast Guard pinaagi sa BRP Teresa Magbanua.
Samtang, gipadala sa Estados Unidos ang USS Santa Barbara ug P-8A Poseidon aircraft, samtang miapil ang Australia pinaagi sa HMAS Supply, MH-60R helicopter ug P-8A aircraft.
Dugang pa, matod sa AFP, nakatabang ang kalihukan sa pagpalig-on sa interoperability ug operational coordination sa tulo ka nasod.
Sa pagkakaron, gibarugan sa Pilipinas, US ug Australia ang padayong defense cooperation ug security efforts alang sa libre, bukas ug luwas nga Indo-Pacific region.
