Gipadayag ni retired Supreme Court Associate Justice Adolfo Azcuna nga posible nang ibasura sa Korte Suprema ang petisyon sa Cayetano bloc nga nagkuwestyon sa legalidad sa sesyon sa Senado niadtong Hunyo 3 tungod mahimo na kining “moot and academic.”
Sumala pa ni Azcuna, nakabase kini sa pagkab-ot ni Senate President Sherwin Gatchalian sa mayoryang suporta sa espesyal nga sesyon sa Senado niadtong Hunyo 17 diin nakakuha kini og 13 ka boto.Lakip usab sa iyang gipasikad ang pagkonsede ni Sen. Alan Peter Cayetano sa iyang posisyon isip Senate President, nga sumala pa kaniya nakapawala sa aktuwal nga kontrobersiya nga gisang-at sa petisyon.
Dugang pa niini, gipasabot ni Azcuna nga anaa na sa Korte Suprema ang pagbuot kon ipadayon pa ba ang pagdungog sa kaso, apan sa iyang panan-aw dili pugngan sa hukmanan ang Senado sa pagpadayon sa pagtuman sa mga katungdanan niini isip usa ka co-equal branch sa gobyerno.
Kahinumduman nga gisang-at sa Cayetano bloc ang petisyon niadtong Hunyo 16 aron kuwestyonon ang legalidad sa Hunyo 3 nga sesyon sa Senado, diin ilang giangkon nga walay quorum sa dihang gihimo ang mga lakang nga nagresulta sa pag-ilis sa liderato sa Mataas nga Kapulungan.
