Nadakpan ang usa ka personahe sa Philippine Coast Guard atol sa joint anti-drug operation nga gipangulohan sa Philippine Drug Enforcement Agency Regional Office 11 (PDEA RO 11), kauban ang National Bureau of Investigation Southeastern Mindanao Regional Office (NBI SEMRO XI) ug ang Philippine Coast Guard (PCG), pasado alas 4:00 sa hapon sa Doña Marcedes Subdivision, Sasa, ning syudad sa Davao.
Ang suspek, giila sa alyas “Edgardo,” 33 anyos, ug aktibong miyembro sa Philippine Coast Guard, nadakpan sa aktuwal sumala pa nga namaligya og iligal nga droga ngadto sa usa ka undercover operative.
Nasakmit sa operasyon ang lima (5) ka sachet sa gituohang shabu, lakip ang buy-bust item, nga adunay kinatibuk-an nga gibana-banang timbang nga 12 gramos ug street value nga ₱81,600.
Gipaklaro sa mga otoridad nga ang ilahang operasyon naggikan sa validated intelligence reports ug surveillance nga nagpamatuod sa giingong kalambigitan sa suspek sa illegal drug activities.
Gibutyag usab sa mga awtoridad nga ang pagkadakop sa nahisgutan nagpakita sa lig-on nga koordinasyon sa lain-laing ahensya ug sa determinasyon sa gobyerno nga palig-onon pa ang anti-drug campaign.
Sa pagkakaron, giandam na ang kasong paglapas sa Republic Act No. 9165 o Comprehensive Dangerous Drugs Act of 2002 batok sa suspek.
