Miabot na sa 188 ang ihap sa mga namatay gumikan sa Bagyong Tino.
SUbay sa report sa Office of Civil Defense (OCD) 33 ang namatay sa Negros Island Region, samtang 140 usab sa Region 7.
Adunay 135 pa ang gikareport nga missing hinungndan nga padayon ang gihimong search, rescue, ug retrieval operations, ilabi na sa Negros Island Region ug Region 7.
Sa detalye, 56 ang nawala sa Negros Island Region ug 79 sa Region 7.
Samtang, sumala sa National Disaster Risk Reduction and Management Council (NDRRMC), 96 ang gikatalang nasamdan.
Apektado ang 2,258,782 ka tawo o katugbang sa 635,565 pamilya, kung diin 397,634 ang temporaryong gipabakwit.
Nangaguba usab ang 9,585 ka mga balay, 9,321 ang partially damage ug 264 ang hingpit nga nangaguba.
Gikareport usab ang danyos sa agrikultura nga nagkantidad og P10,615,193 ug P6,330,000 usab sa imprastruktura.
Dili usab maagian ang 74 ka mga kalsada ug 10 ka tulay.
Samtang, nabalik na ang suplay sa kuryente sa 58 sa 162 ka apektadong lugar, ug ang komunikasyon sa 5 sa 22 lugar.
Bisan pa man, adunay problema lamang gihapon sa suplay sa tubig sa 11 ka mga lugar. Suspendido ang klase sa 707 ka lugar ug trabaho sa 483 lugar.
Nakahimo usab sa paghatag og tabang nga nagkantidad og P111,123,620 ang NDRRMC sa mga biktima.
Na-una na usab nga gi-aprubahan ni Pangulong Ferdinand “Bongbong” Marcos Jr., ang rekomendasyon na ideklara ang state of national calamity gumikan sa grabe nga epekto sa Tino.
