Nagmando si Pangulong Ferdinand Marcos Jr. sa mga ahensya sa gobyerno nga dayon motabang sa mga komunidad nga naapektuhan sa ashfall gikan sa Mayon Volcano, ilabi na sa mga lungsod sa Guinobatan ug Camalig sa probinsya sa Albay. Sumala pa sa Presidential Communications Office (PCO), hugot na ang response operations sa gobyerno aron maprotektahan ang kahimsog sa publiko, masiguro ang kaluwasan sa mga residente, ug mapadayon nga abli ang mga kalsada ug importanteng serbisyo sa mga apektadong lugar.
Nanguna ang Department of Public Works and Highways (DPWH) sa clearing operations aron tangtangon ang baga nga abo sa mga nag-unang kalsada ug masiguro ang luwas nga pagbiyahe sa mga residente ug emergency responders.Samtang, nagpadayon usab ang Department of Social Welfare and Development (DSWD) sa paghatag og tabang sa mga pamilya nga naa sa evacuation centers. Lakip sa niini ang libo-libong family food packs, ready-to-eat meals, ug uban pang relief supplies nga naka-preposition sa tibuok Bicol Region.
Dugang pa niini, naglihok ang DSWD Field Office 5 sa pag-apod-apod sa ready-to-eat food boxes ug sleeping mats, samtang giandam usab ang mobile kitchen aron makaluto og init nga pagkaon kung molungtad pa ang pagpuyo sa mga evacuee.Sumala sa DSWD, miabot na sa P39.6 milyon ang naipang-apod-apod nga ayuda, lakip ang P11.3 milyon para sa Emergency Cash Transfer ug P28.3 milyon ubos sa Cash-for-Work program nga nakabenepisyo sa kapin 2,000 ka mga mag-uuma nga naapektuhan sa aktibidad sa bulkan.Sa kasamtangan, kapin 300,000 ka family food packs ug sobra 7,000 ka ready-to-eat food boxes na ang naipang-apod-apod sa mga apektadong residente sa rehiyon.
Nagdeploy usab ang Department of Health (DOH) og N95 masks, mobile clinics, ug water stations aron matubag ang mga problema sa kahimsog sama sa ubo, kalisod sa pagginhawa, ug iritasyon sa mata tungod sa ashfall.Sa tabang sa Department of the Interior and Local Government (DILG), gipakatag ang Bureau of Fire Protection (BFP) para sa water spraying ug pagpanglimpyo sa abo sa mga komunidad.
Gipangunahan sa Office of Civil Defense (OCD) ug National Disaster Risk Reduction and Management Council (NDRRMC) ang hugot nga pagpahigayon sa evacuation ug padayon nga monitoring sa mga high-risk area.Gipasabot usab sa Pangulo ang mas tukmang pagbantay sa mga suba ug agianan sa tubig tungod sa hulga sa lahar, ilabi na kung adunay kusog nga ulan.
Sa kasamtangan, gi-awhag ang mga residente nga magpabiling alerto, magpuyo sa sulod sa balay kung mahimo, magsul-ob og protective mask, ug motuman sa mga pahimangno sa ilang lokal nga gobyerno.
