Gitinguha karon sa pamilya nga matino ang hinungdan sa kamatayon sa 28-anyos nga fruit vendor nga nakaplagang patay ug naglutaw sa Davao River sa Lacson, Davao City niadtong Agosto 10.
Matud ni Alvin Apog, igsuon sa namatay nga si James Anton Apog sa Brgy. Talomo River, adunay mga detalye sa lawas nga nakapahibulong sa ilang pamilya.
Duda sa pamilya nga dili basta pagkalumos ang hinungdan sa kamatayon tungod kay wala kuno mangluspad ang biktima. Namatikdan usab nila nga adunay samad sa agtang si James.
Giila lamang sa pamilya ang biktima pinaagi sa iyang sinina ug tattoo sa lawas. Nasayran nga nilakaw pa kini niadtong Agosto 8 ug wala na makapauli.
Tungod kay anaa na sa estado sa pagkadugta ang lawas sa dihang nakaplagan, gibalot na kini sa punerarya aron maprotektahan.
Nagpaabot karon ang pamilya sa dugang nga impormasyon aron masayran kung unsa gyud ang nahitabo kang James sa wala pa kini nakaplagang patay. | VIA BOMBO EROS PAJOTA
