Giisip sa Malacañang nga usa lamang ka “diversionary tactics” ang mikaylap nga impormasyon nga giingong nadakpan na si Senador Ronald “Bato” Dela Rosa tungod sa giingong existing arrest warrant gikan sa International Criminal Court (ICC).
Nanawagan ang Palasyo sa publiko nga magmatngon ug susihon ang tinubdan ug motibo sa mga impormasyon nga gipakaylap, ilabi na ang mga balita nga wala pa mapamatud-an pinaagi sa opisyal nga kumpirmasyon.
Sa laing bahin, nagkanayon si kanhi presidential spokesman Atty. Harry Roque nga adunay kunoy “nang-hudas” o nagtraydor kang Senador Dela Rosa.
Gihimo ni Roque ang maong pahayag pinaagi sa usa ka online post human mikatag ang mga balita kabahin sa giingong pagkadakop sa senador.
Sa iyang social media post niadtong Martes, Agosto 4, 2026, miingon si Roque: “Meron nga daw na nang-hudas kay Bato.” Apan wala siya naghatag og dugang detalye ug wala usab niya nganli kung kinsa ang iyang gipasabot nga nagtraydor sa senador.
Samtang, gipanghimakak sa pipila ka ahensya sa gobyerno ang mga taho nga nadakpan na si Dela Rosa.
Nagpahayag ang National Bureau of Investigation (NBI), Philippine National Police (PNP), ug Department of the Interior and Local Government (DILG) nga wala silay opisyal nga impormasyon o kumpirmasyon kabahin sa maong alegasyon.
Sumala sa Palasyo, kulang og igo nga konteksto ang mga pahayag nga gipagawas nila Atty. Bondoc ug Harry Roque kabahin sa kahimtang ni Senador Dela Rosa.
Matud pa ni Usec. Castro, posible nga gigamit lamang ang maong isyu aron malihis ang atensyon sa publiko gikan sa mga isyu nga gipadayag sa Commission on Audit kabahin sa giingong wala pa marekonisar nga paggamit sa confidential funds sa Office of the Vice President ug Department of Education ubos sa pagpangulo ni Vice President Sara Duterte.
Si Sen. Dela Rosa apil sa mga ginganlan sa ICC isip giingong co-perpetrators ni kanhi Pangulong Rodrigo Duterte sa kaso nga may kalabutan sa crimes against humanity nga may kalabutan sa kampanya batok sa ilegal nga droga sa miaging administrasyon.
