DAVAO CITY – Kalagot ang gibutyag nga rason ni PCapt. Hazel Tuazon, ang tigpamaba sa Davao City Police Office, sa pagpatay sa 70 anyos nga bugtong suspek nga si Nenita Pagatpatan ngadto sa iyang katabang nga si Sheila Lagsaway kaniadtong Hunyo 17.
Sumala pa, nabuhat lamang sa suspek ang krimen tungod napuno matud pa kini sa iyang kalagot tungod matag lalis nila sa biktima, musumbong kini sa anak sa suspek.
Dugang pa ni Tuazon nga posibleng planado gayod sa suspek ang krimen.
Kahinumduman nga sa resulta sa medico legal, nakahiagom og binunalan sa ulo ang biktima ug dinunggaban sa tuong bahin sa iyang abaga rason sa hinanaling kamatayon niini.
Atol sa pagrekesa sa kapulisan ngadto sa panimalay sa suspek nga nahimutang sa Block 9, Lot 6, Deca Homes, Cabantian ning dakbayan, limpyo na ang kutsilyo nga gigamit sa suspek.
Daghan matud pa og alibi si Pagatpatan ngadto sa iyang anak aron nga di kini makasulod dayon sa ilang panimalay diin miabot pa kini sa punto nga human milakaw ang anak niini aron mag-asikaso sa ilang bayrunon, iyaha kining gipapalakaw usab aron nga pangitaon matud pa si Lagsaway sa usa ka mall.
Saysay sa suspek human ang interogasyon nga gipahigayon sa kapulisan, migaan matud pa ang paminaw niini human nga iyang naingon ang kamatuoran.
Nakitaan sab og sinseridad sa mga otoridad ang nahitabong pagbutyag ni Pagatpatan.
Gisiguro sa DCPO nga bisan pa man sa idaran nga pangidaron sa suspek, dili gihapon palagpason sa korte ang iyang kalapasan.
Sa pagkakaron, gihikay na sa korte ang iyang pagbalhin sa suspek ngadto sa Davao City Jail sa Maa gikan sa Buhangin PNP.
Hinuon, gipaklaro sa opisyal nga dili kuhaon ang katungod sa anak sa suspek sa pag-atiman niini.
via || Bombo DDB & Bombo LJF
