Gipahimangnoan ang mga residente sa Davao City nga mag-andam sa posibleng pag-ulan ug pagbaha tungod sa localized thunderstorms nga nakaapekto sa Mindanao.
Base sa weather forecast nga balido gikan alas 5:00 sa hapon niadtong Agosto 9 hangtod alas 5:00 sa buntag karong Agosto 10, gilauman ang pat-ak-pat-ak nga panganod ngadto sa mapanganuron nga kalangitan, uban ang katag-katag nga pag-ulan sa Davao City.
Posible usab ang kalit nga pagbaha ug pagdahili sa yuta kon mokusog ang ulan, ilabina sa mga lugar nga dali bahaan ug landslide.
Samtang, kasarangan ngadto sa kusog ang hangin gikan sa habagatan ngadto sa habagatang kasadpan, uban ang kasarangan ngadto sa baluron nga kadagatan.
Gipahinumdoman ang publiko nga magmatngon ug kanunay nga motan-aw sa mga update sa Davao City Disaster Risk Reduction and Management Office ug DOST-PAGASA alang sa ilang kaluwasan.
