DAVAO CITY – Kapin 300 ka mga residente sa Barangay Centro Agdao ning dakbayan ang nakapahimulos sa mga libreng serbisyo nga gidalit atol sa subling paglusad sa Oplan Kalinaw II kagahapong adlawa sa nasangpit nga lugar.
Lakip sa mga serbisyong gitanyag mao ang free general check-up, eye exam, business and financial literacy seminar, legal advice, libreng gupit ug uban pa. Aduna sab gipahigayon nga lecture mahitungod sa Culture of Security, Bomb Awareness, Cybercrime awareness, Family Juvenile Gender and Development, Women and Children’s right and protection.
Bug-os nga pagtinabangay ang gihimo sa mga nagkadaiyang ahensya sa lokal nga panggamhanan sa Davao aron nga mahimong malampuson ang aktibidad. Lakip sa misalmot mao ang City Disaster Risk Reduction and Management Office, Land Transportation Office, PRO XI Regional Medical Unit ug Department of Trade and Industry. Anaa sab ang Davao Durian Eagles Club ug Davao Optima Eagles Club, Mecca Iclinic Foundation ug uban pang private stakeholders. Kahinumduman nga unang gilusad ang Oplan Kalinaw niadtong Setyembre 2018 isip tubag sa bahad sa insurhensiya ug mga militanteng gipaluyohan sa ISIS sa pipila ka rehiyon sa Mindanao.
Sa wala pa ang panahon sa pandemya, liboan na ka mga indibidwal ang naserbisyohan sa programa. Ning kasamtangan, dungan sa subling paglusad niini, mas gipalapdan pa kini ngadto sa medical missions, pro bono legal services ug uban pang social assistance programs.
