Nagsumite ang Oman og sugyot nga joint regional management system alang sa Strait of Hormuz isip lakang aron mapakunhod ang tensyon sa Tungag Sidlakan.
Sumala sa report, gipresentar sa Oman ang maong inisyatibo ngadto sa mga opisyal sa Iran atol sa ilang panagtigom sa Tehran niaging katapusan sa semana.
Ubos sa maong balaod, magbayad ang mga shipping company alang sa pagmintinar sa mga navigation equipment nga makatabang sa luwas nga paglawig sa mga barko nga moagi sa Strait of Hormuz.
Dugang pa, dili na eksklusibong kontrolon sa Iran ang maong agianan sa kadagatan. Hinuon, gisugyot sa Oman ang usa ka sistema nga susama sa pamaagi nga gigamit sa Strait of Malacca diin nagtinabangay ang Indonesia, Malaysia ug Singapore sa pagdumala sa maong shipping route.
Base sa report, ang pondo nga makolekta gamiton alang sa pagmintinar sa mga kagamitan sa paglayag, pagpanalipod sa kalikupan ug search and rescue operations.
Apan, adunay pipila ka Gulf states nga misupak sa pagpatuman og bayranan alang sa mga barkong moagi sa Strait of Hormuz.
Samtang, gipatin-aw sa International Maritime Organization (IMO) nga wala pa kini kabahin sa kasamtangang negosasyon ug ang bisan unsang bag-ong panukala bahin sa shipping routes ug traffic management gumikan kay kinahanglan una nga masusi kini sa ahensya.
