Patay ang usa ka Overseas Filipino Worker (OFW) human maigo sa mga tipik sa drone nga gipabagsak sa air defense sa Saudi Arabia atol sa pagsulay sa pag-atake sa usa ka pasilidad sa lana sa Dammam, sumala sa Department of Migrant Workers (DMW) niadtong Huwebes, Oktubre 22.
Gipukan sa air defense sa Saudi Arabia ang usa ka drone nga misulay sa pag-atake sa pasilidad sa lana sa Shaybah sa Saudi Aramco, apan namatay ang usa ka OFW tungod sa mga tipik nga nangahulog human mapugngan ang drone, sumala sa Energy Ministry sa Saudi Arabia.
“We are closely monitoring the situation and awaiting further reports from our counterparts on the ground. We are praying that no Filipino will be harmed and that it will remain that way,” sumala sa pahayag.
Padayon nga gibantayan sa DMW ang mga taho kalabot sa pag-atake sa Dammam, kauban ang gobyerno sa Pilipinas ug ang mga awtoridad sa Saudi Arabia, aron mahibal-an kung adunay uban pang mga OFW nga naapektuhan sa insidente.
Giawhag sa kalihim ang mga Pilipino sa Saudi Arabia ug sa ubang bahin sa Middle East nga mosunod sa mga lokal nga awtoridad, magpabiling alerto ug kanunay nga magmonitor sa opisyal nga mga pahimangno gikan sa gobyerno sa Pilipinas ug sa mga awtoridad sa nasod nga ilang gipuy-an.
Gitambagan sa DMW ang mga OFW nga likayan ang mga lugar nga posibleng maapektuhan sa mga pag-atake, sama sa mga instalasyon sa militar ug mga pasilidad sa lana.
Gipahinumdoman usab sa ahensiya ang mga OFW nga susihon pag-ayo ang mga iskedyul sa flight sa dili pa mobiyahe ug likayan ang pagkuha og mga litrato ug video sa mga insidente nga may kalabotan sa seguridad sa Saudi Arabia.
