Nanawagan ang Malacañang og imbestigasyon sa posibleng kapakyasan sa mga otoridad human miingon si Interior Secretary Jonvic Remulla nga posibleng nakagawas na sa nasod pinaagi sa “backdoor” si gambling tycoon Charlie “Atong” Ang.
Apan, miinsister si Justice Secretary Fredderick Vida nga nagpabilin sa Pilipinas si Ang base sa rekord sa Bureau of Immigration. Matud niya, wala usab siya mahibalo sa gigikanan sa impormasyon ni Remulla.
Sumala kang Palace Press Officer Claire Castro, kinahanglan susihon kung adunay kapalpakan sa seguridad sa mga utlanan sa nasod. Giklaro usab niya nga dili dayon angay basulon ang bisan kinsang opisyal hangtod mahuman ang imbestigasyon.
Si Ang giatubang ang mga arrest warrant nga giisyu sa mga korte sa Laguna ug Batangas kalabot sa multiple counts of criminal case, lakip ang 15 ka ihap sa kidnapping ug serious illegal detention ug upat ka ihap sa kidnapping with homicide.
Sa laing bahin, gipatin-aw ni Remulla nga walay rekord nga nagpakita nga migawas si Ang pinaagi sa opisyal nga pantalan o airport, apan sumala sa ilang intelligence analysis, posibleng migamit kini og dili opisyal nga ruta. Gidugang niyang posibleng nakagawas si Ang usa ka tuig na ang milabay, sa wala pa giisyu ang mga arrest warrant kaniadtong Enero ug Pebrero.
Gipasidaan usab sa mga opisyal nga huyang gihapon ang pipila ka utlanan sa Pilipinas, apan gipasabot sa Palasyo nga kinahanglan timbangon ang katungod sa tawo ug ang responsibilidad sa mga opisyal, ilabina kung walay hold departure order.
