Gipahayag ni National Bureau of Investigation Chief Melvin Matibag nga positibo ang resulta sa ilang pakigpulong sa mga opisyal sa META sa Singapore kabahin sa negatibong impluwensiya sa social media ngadto sa mga kabatan-onan.
Matod ni Matibag, ilang gipadayag sa META ang nagkadaghang insidente diin ang social media giingong nagamit aron maimpluwensiyahan ang mga menor de edad sa dili maayong paagi.
Naglaum ang NBI nga kung ipatuman sa META ang ilang gisaad nga mas hugot nga measures, mas mapugngan ang harmful content ug mas maprotektahan ang mga kabatan-onan sa ilang platforms.
Sumala pa, mas dali nang mailhan ug ma-track ang mga account nga nagpakaylap og fake news kung mapalig-on ang monitoring ug enforcement sa maong kompanya.
Una nang gibutyag ni Matibag nga adunay mga giingong groomers nga nagagamit sa social media aron duolon ug impluwensiyahan ang mga kabatan-onan, lakip sa pag-aghat kanila sa paghimo og nagkalain-laing krimen.
Sa pagkakaron, naghulat ang NBI sa pagpatuman sa mga lakang nga ilang nahisgutan uban sa META.
