DAVAO CITY – Bisan pa man nga apektado karon ang dakbayan sa Davao sa coronavirus disease 2019 (Covid-19) pandemic, gipasalig sa palasyo sa Malacanang nga mahinayon pa gihapon ang multi-billion Samal Island-Davao City Connector (SIDC) Project (Davao-Samal Bridge) ug Phase 1 sa Mindanao Railway Project.
Sumala pa kang Secretary Vince Dizon, Presidential Adviser on Flagship Programs and Projects, gipasalig sumala pa sa duruha ka ahensiya sa Department of Transportation (DOTr) ug Department of Public Works and Highways (DPWH) nga susamang mahinayon ang mga dagkong proyekto sa Mindanao.
Kini sab ang gipasalig ni Mindanao Development Authority (Minda) executive director Romeo Montenegro diin gitawag niya kini nga key priority infra projects sa administrasyon.
Gani natapos na matud pa ang contract negotiation sa Detailed Engineering Design (DED) sa maong proyekto.
Posibleng magsugod ang DED preparation sa mosunod nga bulan diin usa kini ka feasibility study sa tulay nga pundohan sa Asian Development Bank ilalom sa Infrastructure Preparation and Innovation Facility.
Ipahigayon ang ground breaking sa P23.04-billion bridge sa Hulyo 1 subay sa nahimong anunsiyo ni Davao del Norte Governor Edwin Jubahib diin dungan kini nga himuon sa Azuela Cove sa Davao City ug Barangay Caliclic sa Island Garden City of Samal (Igacos) nga maoy duruha ka interconnecting points sa tulay.
Samtang ang unang hugna sa Mindanao railway project mao ang 102 kilometers, nga mokonekta sa mga siyudad sa Tagum, Davao ug Digos.
Una ng gidungagan sa NEDA ang project cost diin gikan sa P35 billion gihimo kining P81 billion diin kalakip niini ang construction sa oil depot sa siyudad.
