DAVAO CITY – Gilauman nga adunay mapasakahan og kaso ang Special Investigaton Task Group kon SITG Bragas gumikan sa pagbutyag sa usa ka saksi sa nahitabong paglugos -patay kang Arch. Vlanche Marie Bragas.
Sumala pa ni DCPO Director ug SITG Bragas Commander nga si PCol. Alberto Lupaz nga usa ka witness ang nagkanayon nga nihunong sa tungod ni Bragas ang bao-bao o trike bike nga gisakyan sa biktima ug gimaneho sa usa ka hamtong nga suspek una pa man ang pagpatay kaniya niadtong Mayo 18.
Dugang pa sa opisyal nga sa panahon nga mahan-ay na ang pahayag sa witness ug mga dokumento, gikatakdang mapasakahan og kasong Rape with Homicide ang mga suspek nga responsable sa kamatayon sa 28 anyos nga arkitekto.
Gibutyag sab sa opisyal nga walay mga fingerprints sa crime scene.
Gipasalig sa opisyal nga karong Biyernes o Sabado pa maghatag og mga detalye sa mga resulta sa nagpahinabong imbestigasyon sa SITG Bragas.
Sa pikas bahin, wala pay pahayag ang SITG mahitungod sa pagka-aresto ni Renato Bayansao alyas Empoy nga gituohang usa sa mga persons of interest diin kahiumdomang nasikop sa buy-bust operation sa NBI 11 niadtong nakalabayang simana.
Gitutukan sab karon sa SITG Bragas ang kaso sa mga na-abduct nga mga giakusahang persons of interest sa Calinan, ning dakbayan.
