DAVAO CITY – Pormal na nga gideklara sa Panabo City Davao del Norte nga persona non-grata ang mga sakop sa Communist Party of the Philippines-National Democratic Front-New People’s Army (CPP-NDF-NPA) sa ilang lugar.
Kahinumduman nga gipangunahan mismo ni Mayor Jose E. Relampagos ang deklarasyon pinasikad kini sa gipagulang Executive Order 70 nga tumong ang pagtapos sa pagsulod sa komunista sa lugar.
Gihulagway ni Relampagos ang deklarasyon nga mahinungdanon nga lakang aron nga tapuson ang NPA armed conflicts ug ipatuman ang kalinaw sa tanan nga komunidad sa siyudad.
Gitataw sab ni Konsehal Gregorio Uy Dujali III nga ang nahisgutan nga deklarasyon maoy dalan aron nga tapuson ang pag-antus ug maangkon ang kagawasan gikan sa kamot sa komunistang grupo.
Samtang gitataw sab ni Col. Nolasco Mempin, commander sa 1003rd Brigade sa Philippine Army nga karon na ang tukmang panahon aron nga mobarog batok CPP-NDP-NPA ilabi na nga sila ang nagapanghasi sa mga sibilyan ug kagamhanan sulod na sa 50 ka tuig sukad sila namugna.
Gidayeg sab ni Mempin ang Task Force to End Local Communist Armed Conflict (NTF-ELCAC) sa paghatag niini ug mga nag-unang serbisyo, proyekto ug programa sa nagkadaiyang komunidad.
