DAVAO CITY – Nagmalampuson ang gipahigayong Labor Day Jobs Fair karong tuiga sa tulo ka mga syudad sa Davao Region.
Sumala sa Department of Labor and Employment kon DOLE 11, miabot sa 2,201 ang mga nag-apply og trabaho sa mga job fairs nga gipahigayon sa Davao City, Tagum City ug Digos City.
Gikan sa maong ihap, 1,086 niini ang gikan sa Davao City diin 61 ang na-hire on the spot, ug nasa 201 ang mga near-hired nga mga aplikante.
Sa Digos City, nasa 510 ang misalmot diin nasa 37 ang hired on the spot ug 150 ang anaa sa inisyal nga proseso sa pag-hire.
Miabot sa 605 ka mga aplikante ang nanimpalad nga makatrabaho diin anaa sa 78 ang awtomatikong na-hire ug anaa sa 200 ang i-hire pa lamang sa mga kumpanya.
Gibutyag ni DOLE XI Regional Director, Atty. Randolf Pensoy nga adunay sento singko ka mga partcipating employers kung asa, 97 niini kay local employers ug 8 ka overseas employers.
Dugang niya nga aduna usab 7,524 ka mga job vacancies, 6,262 niini sa local ug 1,262 sa overseas.
Base sa datus nga gipaguwa sa DOLE XI, Top 5 sa local job vacancies nga gilangkuban sa Customer service representative, Sales Rep., Sales clerk, Tech support, ug cashier, samtang sa top 5 international job vacancies nga gilangkuban sa cleaners, factory workers, nurses, sales, ug shelving worker.
Samtang, gisugat ug lihok protesta ang pagsaulog sa Labor day karong adlawa dinhi sa dakbayan sa Davao.
Gipahigayon ang maong aktibidad sa Freedom Park sa Roxas Avenue nga gisalmutan sa mga nagkadaiyang grupo dinhi sa dakbayan sama sa Kiliusang Mayo Uno ug uban pang mga pundok nga gipanawagan niini ang P150 pesos nga usbaw sa sweldo dungan sab sa pagsaka sa mga presyo sa mga palaliton sa mga mamumuo ug uban pang mga isyu ning kasamtangang panahon ilabi na sa hisgutanang modernisasyon sa mga pampublikong sakyanan.
Gipanawagan sab sa mga militante ang ilahang pagkontra sa Public Transport Modernization Project dinhi sa Davao City nga sumala pa makapabalda sa batakang gipanguhaan og income sa mga local PUV drivers and operators.
Nanawagan sab ang mga grupo batok sa pagduso ni Marcos Jr. sa Charter Change nga amyendahan ang mga political and economic provisions sa konstitsusyon nga nag-una sa 100% nga foreign ownership sa yuta, negosyo ug serbisyo publiko, nga makapasamot sa kahimtang karon nga giatubang sa katawhang Pilipino.
Samtang anaa sab ang presensya sa kapulisan nga nagbantay sa palibot alang sa hapsay ug malinawon nga ika-122nd nga kasaulugan sa Labor Day dinhi sa nasud.
via || Bombo JF & Bombo LJF
