Nagpadayon gihapon sa kadaghanan sa mga menor de edad sa Australia ang paggamit sa social media bisan tulo ka bulan na sukad gipatuman ang nationwide ban alang sa mga ubos sa 16 anyos. Sumala pa sa eSafety, ang internet safety regulator sa Australia, napakyas ang age verification measures sa mga social media platforms, hinungdan nga daghang mga menor de edad ang nakasulod ug nakahimo gihapon og mga account.
Dugang pa niini, gipadayag sa pagtuon nga nagpabilin nga halos wala mausab ang paggamit sa social media sa mga batang nag-edad og 10 hangtod 15 anyos, bisan tulo ka bulan na sukad gipatuman ang maong balaod. Lakip sa mga social media platforms nga gigamit gihapon sa kapin 80 porsiyento sa mga kabatan-onan mao ang YouTube, TikTok, Snapchat, Facebook, ug Instagram, bisan mikunhod ang gidaghanon sa adunay kaugalingong account.
Kahinumduman nga ang Australia mao ang unang nasud nga mipatuman og nationwide ban sa social media alang sa mga ubos sa 16 anyos aron mapanalipdan ang kahimsog ug kaayohan sa mga kabatan-onan. Sa pagkakaron, nagpadayon ang imbestigasyon sa gobyerno sa Australia batok sa pipila ka dagkong tech companies tungod sa giingong kapakyasan sa pagsunod sa bag-ong balaod.
