-- ADVERTISEMENT --

Nanghinaot ang gobyerno sa Pilipinas nga mouyon si United States President Donald Trump sa pagpaubos sa 12.5 porsyentong taripa nga gipahamtang sa mga produktong gikan sa Pilipinas nga mosulod sa merkado sa Amerika.

Gipadayag ni Department of Trade and Industry (DTI) Secretary Ma. Cristina Roque nga usa kini sa mga nag-unang isyu nga gilaumang hisgotan ni Pangulong Ferdinand “Bongbong” Marcos Jr. atol sa bilateral meeting niini uban kang Trump sa Malacañang karong adlawa, Nobyembre 18.

Kahinumdoman nga niadtong Hulyo 2026, gipataas sa administrasyon ni Trump ngadto sa 12.5 porsyento ang taripa sa mga produktong gi-eksport sa Pilipinas ngadto sa Estados Unidos, isip kabahin sa lakang sa Amerika batok sa mga produkto nga may kalabotan sa pinugos nga pagpatrabaho o forced labor.

Base sa banabana sa DTI, mokabat sa 34.28 porsyento sa kinatibuk-ang eksport sa Pilipinas ngadto sa Estados Unidos, nga nagkantidad og dul-an sa 6.25 billion dollars o tugbang sa ₱98,192,125.00 ang apektado sa maong taripa.

Lakip usab sa gilaumang hisgotan sa duha ka lider ang Joint Administrative Order No. 26-01 nga gipirmahan kaniadtong Hulyo 23, 2026, isip lakang sa Pilipinas batok sa pagsulod sa mga produktong gihimo pinaagi sa pinugos nga pagtrabaho.

-- ADVERTISEMENT --

Pinaagi sa maong mando, gitukod ang inter-agency committee nga pangunahan sa DTI aron imbestigahan ang mga reklamo kalabot sa mga produktong posibleng gihimo pinaagi sa forced labor, diin mahimong pugngan sa Bureau of Customs ang pagsulod sa mga makumpirmang produkto.

Samtang, wala magbutyag si Secretary Roque sa eksaktong porsyento sa taripa nga tinguha sa Pilipinas nga ipaubos sa Estados Unidos aron dili paunhan ang resulta sa ilang negosasyon.

Gilauman sa administrasyon nga makatabang ang maong kasabotan ug mga lakang sa gobyerno sa pagpakita sa pagsunod sa mga sumbanan batok sa forced labor aron mapagaan ang gipahamtang nga taripa sa mga exported goods sa nasud.