DAVAO CITY – Ubay-ubay na ang mga nasikop sa otoridad dinhi sa dakbayan sa Davao gumikan sa nagkadaiyang kalapasan nga nahimo partikular na ang pagsupak sa Health protocols.
Una ng gibutyag sa Public Safety and Security Command Center (PSSCC) nga luyo sa kanunay nga pahimangno sa otoridad, daghanan pa gihapon ang mosupak diin sa ulahing datus sa ahensiya anaa na sa halos 50,000 ang mga nadakpan gumikan sa paglapas sa minimum health protocols.
Sumala pa kang PSSCC head Angel Sumagaysay, sagad sa mga nadakpan ang pakyas nga mosuot ug face masks ingon man social distancing.
Gawas niini, nakasikop sab ang local authorities ug 80 ka mga indibidwal human nga nagpresenta ang mga nahisgutan ug peke nga mga reverse transcription polymerase chain reaction (RT-PCR) test results; 5,251 ka mga indibidwal ang nasikop human nga walay barrier ang motorsiklo diin 1,584 ang napasakahan na ug kaso.
Gitataw ni Sumagaysay nga padayon karon ang lokal nga kagamhanan sa pagpatuman sa hugtanon nga protocol ug siguruhon nga manubag ang mga malapason niini.
Ipabilin sab sumala pa siyudad ang quarantine control points ug hugtanon nga pagbantay sa mga checkpoints bisan pa man nga nakatala ang dakbayan ug pag-ubos karon sa kaso sa Covid-19.
