Gikansela ang mga klase sa University of Negros Occidental–Recoletos (UNO-R) kagahapon, Hulyo 16, 2026, human makit-an ang usa ka buhing bala ug usa ka sinulat nga mensahe sulod sa Senior High School Building sa unibersidad.
Sumala ni Police Captain Peter John Ramos, Station Commander sa Bacolod Police Station 6, nakadawat sila og tawag gikan sa eskwelahan alas 12:10 sa udto kalabot sa insidente.
Gitugyan sa head security sa eskwelahan ngadto sa mga awtoridad ang gituohang .45 caliber nga bala ug ang sinulat nga mensahe nga adunay hulga batok sa mga giingong “bully”. Ang duha ka ebidensya gisailalom sa eksaminasyon ug padayon nga giimbestigahan sa mga awtoridad aron matino ang gigikanan ug tinuod nga tuyo niini.
Sa inisyal nga imbestigasyon, giingon ni Ramos nga posible kining usa ka pamaagi sa pagpanghadlok nga adunay kalabotan sa panagbangi sa pipila ka mga grupo.
Samtang, giklaro sa Bacolod City Police Office (BCPO) nga walay bomb threat ug walay nahitabong pagpamusil sulod sa campus. Matod ni Bacolod City Mayor Greg Gasataya, gipasiguro ni BCPO Director Colonel Eugene Rebadomia nga kontrolado ang sitwasyon ug luwas ang mga estudyante, magtutudlo, ug kawani sa unibersidad.
Gipasidunggan usab ni Police Regional Office–Negros Island Region (PRO-NIR) Director Brigadier General Romano Cardiño ang mga estudyante ug opisyal sa eskwelahan tungod sa ilang dali nga pagreport sa insidente, nga nakatabang aron dayon makaresponde ang kapulisan ug mapatuman ang mga lakang sa seguridad.
Samtang, gikansela usab ang mga klase sa University of St. La Salle (USLS) human makadawat usab og hulga sa pagpamusil.
Base sa report, usa ka inahan ang mitaho sa opisina sa eskwelahan human ang iyang anak nga estudyante nakadawat og mensahe alas 2:00 sa kaadlawon nga naghulga sa duha ka estudyante sa mosunod nga adlaw.
Sa advisory nga gipagawas sa USLS, gipasiguro sa ialng buhatan nga nakigtambayayong na sila sa ilang security office ug sa mga law enforcement authorities.
