DAVAO CITY – Gipasuspinde sa City Government of Mati sa Davao Oriental ang tulo ka mga terminal human makitaan ug kuwang nga mga rekisitos alang sa ilang operasyon.
Pinaagi sa gipagawas nga Cease and Desist Order niadtong Setyembre 16, gipahunong una sa pag-operate ang mga van terminals sa DAVAMODA, MAVOTS, ug MANOSOBVATA nga nahimutang sa Madang, Mati City.
Sumala pa sa Mati Centennial Transport Terminal Complex Board, nag-atubang ug nagkalain-laing mga isyu ang mga nahisgutang terminal.
Nasuta sa buhatan nga nag-expire ang prangkisa sa DAVAMODA niadtong Marso karung tuig ug nakarehistro lamang kini sa Office of the City Building Official isip private garage ug dili van terminal.
Samtang wala pay prankisa sab ang mga drayber sa MAVOTS ug wala gi-renew ang prangkisa sa MANOSOBVATA niadto pang tuig 2020.
Sumala pa sa City Information Office, mamahimo gihapon ma-renew ang prangkisa sa DAVAMODA ug MAVOTS kon magsunod sila sa rekisitos nga gilauman sa LTFRB.
Apan sa kaso sa MANOSOBVATA, dili na sila maka-renew pa tungod sab sa pagbaton ug daghang mga violations.
via || Bombo LJ Florendo
