Nabalaka ang mga estudyanteng Malaysian nga nag-eskwela sa United States tungod sa bag-ong visa rules nga nagtakda og limitasyon sa gidugayon sa ilang pagpabilin sa maong nasud.
Gibutyag sa pipila ka Malaysian students nga nakahatag kini og kawalay-kasigurohan, ilabina sa mga estudyanteng kinahanglan mouli sa Malaysia alang sa visa stamping tungod sa kahadlok nga basin dili na sila tugotan nga makabalik sa US.
Sumala sa Malaysian student nga si Yasmin Muhaiddin, usa ka PhD student sa Texas, dako usab ang mahimong gasto sa pagpauli alang sa visa stamping, lakip ang pamasahe, visa application fees, akomodasyon ug uban pang travel expenses.
Dugang pa niini, giingon ni Yasmin nga mahimong mawala ang panahon, kuwarta ug paningkamot nga ilang gigahin sa edukasyon kung dili sila makabalik sa US.
Ubos sa bag-ong polisiya sa administrasyong Trump, gipulihan ang kanhi “duration of status” system ug gitakdang admission period alang sa mga international students.
Lakip sa mga kausaban ang paglimit sa F ug J visas sa kasagarang upat ka tuig, samtang gipamubo usab gikan 60 ngadto sa 30 ka adlaw ang grace period alang sa mga gradwado nga mobiya sa US o mag-ilis og visa status.
Sa pagkakaron, ang mga estudyanteng molapas og upat ka tuig sa ilang programa kinahanglan mangayo og extension of stay gikan sa US Citizenship and Immigration Services, diin apil ang background checks ug biometric screening.
Gipahinumdoman usab sa National Assembly of Malaysian Students in the United States of America ang mga estudyante nga magplano daan, ilabina sa ilang academic timelines ug umaabot nga employment plans.
