Nagtigom ang mga pamilya sa mga biktima sa extrajudicial killings o EJK alang sa usa ka misa kaniadtong Oktubre 29,2026 aron hinumdoman ang ilang mga namatay nga minahal ug iampo ang hustisya ug pag-ayo sa ilang kasakit ayha ang Undas.
Gipangulohan ni Father Flaviano “Flavie” Villanueva, nga dayag nga misupak sa madugong kampanya batok sa ilegal nga droga, ang maong misa sa Diocesan Shrine of Jesus the Divine Word–Christ the King Mission Seminary.
Sumala kang Fr. Villanueva, gipasayo ang paghiwat sa misa aron mahatagan og higayon ang mga pamilya ug ang Simbahan nga makaangay sa ilang mga iskedyul taliwala sa daghang kalihokan panahon sa Undas.
Pasiugda usab sa pari nga sama sa ubang mga Pilipino, moduaw usab sa lubnganan sa ilang mga minahal ang mga pamilya sa mga biktima ug padayon nga isaysay ang mga handumanan ug istorya sa ilang mga namatay.
Gihinumdoman usab atol sa misa ang mga nangamatay atol sa kampanya batok sa ilegal nga droga panahon sa administrasyon ni kanhi Pangulong Rodrigo Duterte.
Human sa misa, naghalad og mga bulak ang mga pamilya ngadto sa usa ka temporaryong altar diin gibutang ang mga litrato, ngalan, petsa sa pagkamatay ug kataposang mga pulong sa ilang mga minahal.
Gisaulog ang Undas matag Nobyembre 1, nga mao ang All Saints’ Day, ug Nobyembre 2 alang sa All Souls’ Day.
