Nagpahayag og kasubo ug kadismaya ang Malacañang mahitungod sa nag viral nga insidente diin pipila ka mga estudyante ang nakitang misinggit og dili maayong mga pulong batok kang Presidente Ferdinand Marcos Jr. atol sa iyang pagbisita sa Davao City.
Ang maong reaksyon misunod sa pagkatag sa usa ka video sa social media nga kunoy nagpakita sa pipila ka mga estudyante nga nagsinggit batok sa Pangulo samtang molupad na ang iyang gisakyang helicopter gikan sa temporaryong landing site sa Calinan, Davao City. Sumala sa mga report online, ang helicopter mitugpa duol sa Calinan National High School atol sa pagbisita sa Presidente sa People’s Ville housing project sa Riverside, Calinan District ubos sa Pambansang Pabahay Para sa Pilipino kaniadtong Hulyo 28, 2026.
Sumala ni Palace Press Officer Claire Castro, makapaguol nga ang maong panghitabo nahitabo sulod pa gayod sa usa ka eskwelahan. Matud pa niya, dili makat-on ang mga kabatan-onan og maayong pamatasan kung ang ilang mga gitan-aw nga lider o mga tawo sa ilang palibot dili usab maayong ehemplo. Dugang pa niini, nanawagan si Castro nga ibalik ang maayong pamatasan ug disiplina aron dili mapasagdan ang kabatan-onan.
Kahinomduman nga una nang nangayo og pasaylo ang Department of Education Schools Division of Davao sa giingong dili angay nga binuhatan sa pipila ka mga estudyante atol sa pagbisita sa Pangulo.
Sumala sa DepEd Davao, ang upat ka mga estudyante nga nalambigit sa insidente gipailalom na sa angayng disciplinary measures, guidance ug counseling, ingon man values formation interventions aron mapalig-on ang responsableng pamatasan, digital citizenship ug pagrespeto sa uban.
Sa pagkakaron, gipasiugda sa DepEd nga padayon silang makigtambayayong sa mga ginikanan ug komunidad aron mapalig-on ang maayong pamatasan ug mapadayon ang usa ka luwas ug matinahuron nga palibot sa pagkat-on.
