DAVAO CITY – Nabulabog ang tibuok syudad sa Panabo sa Davao del Norte gumikan sa taho nga usa ka Elf truck ang giitsahan og granada didto sa Purok Pantukan 1, Brgy. J.P Laurel, Panabo City, Davao del Norte bandang alas-6:50 sa gabii, adlawng Miyerkules, Abril 24.
Sumala sa report sa Davao del Norte Police Provincial Office, gimaneho ang maong Elf truck ni Yushiheto Abapo, 28 anyos, samtang giila sab ang iyang kasakay nga si Loreta Saga Abapo, 56 anyos, pulos residente sa Purok 2, Brgy. New Opon, Magsaysay, Davao del Sur.
Nasayran nga ang idaran nga biktima, asawa sa kapitan sa Brgy. New Opon, Magsaysay, Davao del Sur, nga kahinumduman nga gironda sa otoridad ang balay niini ug nakuhaan kini ug ubay-ubay nga armas niadtong Marso 26, 2024.
Sumala sa taho, duha ka wala mailhing indibidwal ang sakay sa usa ka motorsiklo nga gihulagway nga nagsoot og black shirt ug naka-helmet samtang naka-white shirt nga walay helmet ang angkas niini.
Pagsubay sa national highway sa maong lugar dihang gilabayan silang duha og granada ug kalit kining nibusikad, hinungdan sa pagkaangol sa mga biktima.
Dali sab nga nadala sa Carmen District Hospital apan nakabsan sa kinabuhi si Loreta samtang nagpaalim pa ang drayber sa Elf truck nga si Yushiheto.
Nagpadayon gihapon ang kapulisan sa imbestigasyon sa maong insidente.
Sa pikas bahin, gipasalig sa Task Force Davao nga magpabiling luwas ang tibuok Davao City gumikan sa pagpaghugot sa mga border points sa dakbayan nunot sa insidente.
Gipanawagan sab sa opisyal nga kuptan gihapon ang culture of security pinaagi sa pagpahibalo sa mga kadudaduhang tawo o kabtangan ngadto sa mga otoridad.
via || Bombo LJF
