Gikumpirma sa Philippine Atmospheric, Geophysical and Astronomical Services Administration (PAGASA) nga nahimo nang tropical depression ang low pressure area (LPA) nga ilang ginamonitor sa gawas sa Philippine Area of Responsibility (PAR).
Base sa pinakabag-ong datos sa state weather bureau, ang maong tropical depression katapusang namataan sa gilay-on nga 2,905 kilometro sa sidlakan sa habagatan-sidlakang Mindanao.
Gipahayag sa PAGASA nga gamay ra ang posibilidad nga mosulod kini sa PAR, ug wala usab gilauman nga makaapekto sa kahimtang sa panahon sa bisan unsang bahin sa Pilipinas tungod kay posible usab kini nga maluya ug malusaw.
Samtang, nagpadayon ang epekto sa southwest monsoon o habagat, nga magdala og mga localized rain showers ug thunderstorms sa Extreme Northern Luzon.
Sa laing bahin, ang kadaghanang lugar sa nasud magpadayon sa pagsinati og init ug alimuot panahon, ilabina sa hapon ug gabii.
