DAVAO CITY – Human ang pipila ka adlaw nga delay sa pagpanghatag og relief goods, gikanayon ni Davao City Mayor Sara Duterte-Carpio nga target sa lokal nga panggamhanan nga mahuman ang unang round niini sa 182 barangay sa adlaw nga Biyernes, Abril 3.
Sumala sa Mayor, target nga mahatag ang hinabang sa 332,626 ka mga pamilya nga apektado tungod sa gipatuman nga community quarantine hatud sa pagkuyanap sa coronavirus disease (Covid-19) pandemic.
Sa higayon nga matapos na ang unang round, mangandam gilayon sa ikaduha nga round aron nga matunolan gilayon kadtong mga kabus nga indibidwal.
Una nang gibutyag sa Mayor nga target nila nga matag semana ang paghatag og hinabang ilabi na nga molungtad lamang og unom hangtud sa pito ka adlaw ang relief goods.
Gi-angkon sa Mayor nga hinay ang repacking kini tungod kinahanglan pa og dugang nga goods nga maoy ipanghatag gawas sa suliran nga gi-atubang sa suppliers ug repackers.
Una ng gi-awhag sa Mayor kadtong wala nakadawat o adunay reklamo sa ilang nadawat nga hinabang nga i-report gilayon kini sa CSWDO.
