DAVAO CITY – Plano karun sa lokal nga kagamhanan nga makighinabi sa regional office sa Department of Education (DepEd 11) alang sa plano nga vaccination rollout sa mga tulonghaan sa pampublikong eskwelahan sa siyudad.
Hinuon magdepende pa gihapon kung musugot niini ang Deped ilabi na nga pabilin pa gihapon kini boluntaryo uban ang pagtugot sa mga ginikanan.
Tipik lamang gihapon kini sa ubos nga turnout sa vaccination sa pediatric population sa dakbayan.
Nasayran nga sukad April 1, 2022 ang mga nabakunahan nga mga A3 o pediatric population with comorbidities ang adunay 762 na nga nakadawat ug first dose ug 372 sa second dose.
Samtang sa pediatric population without comorbidities, anaa sa kinatibuk-ang 140,846 ang first dose ug 130,877 sa second dose.
Samtang gitino sab sa lokal nga kagamhanan nga wala pay rekisitos nga kinahanglan fully vaccinated ang estudyante nga mupartisipar sa face-to-face classes.
Apan kinahanglan nga pahugtan ang vaccination campaign pinaagi sa pagdala niini ngadto sa mga tawo ilabi na kadtong walay panahon nga makaadto sa mga vaccination sites.
