DAVAO CITY – Gipalig-on pa karon sa lokal nga kagamhanan ang pediatric vaccine rollout alang sa 5 hangtud 11 anyos kini pinaagi sa pag-abli ug dugang pa nga mga vaccination sites.Una ng gibutyag ni Dr. Michelle Schlosser, tigpamaba sa Davao City Covid-19 Task Force nga nangandam na ang siyudad sa pag-abli sa dugang pang tulo ka mga district sites ingon man vaccination hubs sa SM City Ecoland, Gaisano Mall of Toril ug F. Dizon Elementary School.
Sumala pa kang Schlosser adunay mga inisyal nga hinabi aron nga subli nga ablihan ang Southern Philippines Medical Center (SPMC) alang sa vaccination sa 5 to 11 years old.
Kahinumduman nga sa nahisgutan nga ospital gipahigayon ang pilot sa pediatric vaccination alang sa 5 to 11 years old sa milabay nga Pebrero 14, 2022.
Apan gihunong na kini kaniadtong Pebrero 21, 2022 human nga gi-ablihan ang special vaccination sites alang sa mga bata sa San Roque Elementary School ug Hizon Elementary School.
Naglaum ang Davao City Covid-19 Task Force nga daghanan pang mga bata ang mabakunahan aron nga ma-protektahan batok sa makamatay nga kagaw.
