Ginahimo karon ang pag-andam sa dugang pang mga kaso nga ipasaka nga adunay kalabotan sa flood control anomaly.
Sa usa ka paghinabi, gipadayag ni Ombudsman Jesus Crispin Remulla nga adunay lima hangtod unom pa ka mga kaso nga nakalinyada ug ipasaka sulod sa duha ka semana.
Bisan paman niini, wala na kini mohatag paog dugang detalye kabahin niini.
Gikumpirma usab sa Ombudsman nga si kanhi House Speaker Martin Romualdez ang gipasabot nga magbabalaod nga giisyuhan na og freeze order.
Kagahapong adlawa, gitaho sa Anti-Money Laundering Council (AMLC) nga nakakuha na kini og freeze order gikan sa Court of Appeals (CA) batok sa assets sa usa ka wala pa ginganli nga magbabalaod nga giingong nalambigit sa flood control corruption scandal.
Sakop sa maong freeze order ang 25 ka mga bank accounts sa magbabalaod ug 10 ka insurance policies nga nakarehistro sa iyahang ngalan. Ang maong lakang kabahin sa padayong imbestigasyon batok sa mga nalambigit sa giingong anomalosong flood control projects sa gobyerno.
Samtang, gipadayag usab sa Ombudsman nga ang kasamtangang kaso anaa pa sa preliminary investigation ug ilahang ginabantayan ang due process, ilabi na kay ang ilahang giatubang usa ka gamhanang grupo gikan sa gobyerno nga adunay daghang kwarta ug impluwensya.
