Nagtigom na og mga ebidensiya si Senador Panfilo “Ping” Lacson batok kang Senador Alan Peter Cayetano alang sa pagpasaka og kaso batok kaniya, sumala sa iyang pahayag taliwala sa nagkagrabeng panagbangi sa duha ka mga senador.
Mitumaw ang panaglalis human gikuwestiyon ni Cayetano ang Statements of Assets, Liabilities and Net Worth (SALNs) ni Lacson, diin iyang giingong misaka pag-ayo ang net worth sa senador niadtong 2025 bisan wala na kini sa serbisyo publiko.
Matud ni Lacson, milapas na sa limitasyon ang mga akusasyon ni Cayetano batok kaniya, ug dili na niya tugotan nga magpadayon pa kini samtang iyang depensahan ang iyang integridad.
Apan, tubag ni Cayetano nga wala niya gikuwestiyon ang integridad ni Lacson sa giingong flood control probe, kondili ang mga indibidwal nga nalambigit sa maong isyu.
Sa laing pahayag, gipasiugda ni Lacson nga dili siya abusado o kurakot nga opisyal sa gobyerno. Matud pa niya, lehitimo ang iyang mga kita gikan sa iyang mga negosyo ug misaka lamang ang iyang income human siya mibiya sa serbisyong publiko, nga mahimong mapamatud-an pinaagi sa iyang income tax returns.
Dugang pa ni Lacson, wala siya makadawat og bisan unsang kickback gikan sa mga proyekto sa gobyerno, lakip ang slope protection ug uban pang infrastructure projects.
Gisaway usab ni Lacson si Cayetano, kinsa iyang giingong adunay bilyon-bilyong pisong budget insertions ubos sa 2025 General Appropriations Act.
