Mipadayag si Senator Panfilo “Ping” Lacson nga nakit-an nila ang pipila ka gikuwestiyon nga lump sum appropriations alang sa mga infrastructure projects sa gisugyot nga P7.2-trilyon nga national budget alang sa 2027.
Gihangyo ni Lacson nga hatagan og detalye ug klarong pagpasabot ang maong mga pondo, nga posibleng hisgutan usab atol sa Development Budget Coordination Committee o DBCC briefing sa Agosto 27.
Gipasabot usab niini nga ang lump sum appropriation nagtumong sa kinatibuk-ang pondo nga gitagana alang sa usa ka proyekto o programa nga walay detalyadong pagkabahin-bahin sa mga gasto.
Giila ni Lacson nga madawat ang maong pamaagi alang sa calamity funds, apan gikuwestiyon kini kung gamiton alang sa mga infrastructure projects.
Gipunting usab niya nga susihon nila ang budget aron masuta ang posibleng special provisions nga mahimong magamit sa pag-abuso sa unprogrammed appropriations.
Samtang, gipasalig ni Senate Finance Committee Chairman JV Ejercito nga dili niya tugotan ang mga budget insertion sa bicameral conference committee kung wala kini gilakip sa budget version sa Senado o House of Representatives.
Sa kasamtangan, gilauman nga masusi pa sa mga senador ang mga detalye sa gisugyot nga national budget aron masiguro ang hustong paggamit sa pondo sa gobyerno.
