DAVAO CITY – Dako ang kalipay sa daghanang mga residente gikan sa Brgy. Bunawan, Davao City human nga nakabenipisyo sa nagpadayong Barangay Caravan nga gipangunahan mismo sa lokal nga panggamhanan sa Davao.
Nag-unang tumong sa maong caravan ang paghatud og tabang ug serbisyo gikan sa mga Local and National Government Agencies ngadto sa mga nagkinahanglang katawhan.
Daghanang mga assistance sa gobyerno ang naglangkob sa maong programa sama na lamang sa medical ug legal assistance ug uban pang mga serbisyo.
Personal usab nga mitambong si Mayor Sebastian Duterte sa maong kalihokan diin mihatag gayud kini og panahon aron nga makahimamat ug mapaminawan usab ang mga hangyo ug problema sa mga residente.
Nanawagan na lamang sab karon si Baste sa katawhan nga dili sayangon ang kahigayonan ug pahimuslan ang mga serbisyo nga available sa matag ipahigayon nga Barangay Caravan diri sa syudad.
