DAVAO CITY – Wala sumala pay problema sa security sector kung subli nga ipatuman ang extension sa martial law sa Mindanao.
Hinuon abli sab sumala pa sila kun ugaling hingpit na nga tapuson ang pagpatuman niini.
Kahinumduman nga una ng gibutyag ni National Defense Secretary Delfin Lorenzana nga posibleng dili na kini mopabor nga lugwayan ang balaod militar sa Mindanao ilabi na kadtong mga dapit nga nagpabilin ang bahad sa mga dautang elemento.
Hinuon gikanayon sa kalihim nga mag-agad lamang gihapon siya kung unsa ang mamahimong rekomendasyon sa kapulisan ug kasundalohan.
Una ng gibutyag ni Lt. Col. Ezra Balagtey, tigpamaba sa Eastern Mindanao Command, wala sumala pay problema sa kasundalohan kung undangon na ang pagpatuman sa Martial law sama na sab sa nauna nga sugyot ni Davao City Mayor Inday Sara Duterte-Carpio nga dili na ilakip ang dakbayan sa Davao sa higayon nga subling adunay extension kalabot niini.
Samtang sa bahin ni Col. Consolito Yecla, commander sa Task Force Davao (TFD), andam sab sila nga motamud kung unsa man ang mamahimong desisyon apan buot nila nga morekomenda ug pipila ka mga lakang nga makatabang aron nga magpabilin ang hugtanon nga seguridad ilabi na dinhi sa dakbayan sa Davao sama na lamang sa pagpatuman sa Gun ban.
