DAVAO CITY – Gipahimangnoan sa Police Regional Office kun PRO XI ang publiko na dili angay tuohan ang mga mikuyanap karon na mga dili beripikadong impormasyon sa social media ug ilabi na ang pagpanic. Matud pa ni Police Major Eudisan Gultiano, ang tigpamaba sa PRO XI, walay natala nga kaso sa pangdagit ug isakay sa van dinhi sa davao region, sukwahi sa mga nag viral na mga posts sa social media. Apan, gikumpirma niini na adunay mga natalang report sa nawalang mga indidibwal tungod kini sa mga laing mga rason subay sa resulta sa imbestigasyon sa kapulisan. Apan, bisan pa man di kini tinuod, nagpasalig ang kapulisan na mas pahugtan pa ang proteksyon ug seguridad sa convergence areas ug pagpakusog sa police visibility ilabi na sa mga tulonghaan. Samtang, sa pikas bahin, Gimanduan sab ni Police Colonel Alberto Lupaz, ang director sa Davao City Police Office kun DCPO, ang tanang Station Commander ug Hepe sa City Intelligence Unit kun CIU nga pahugtan ang seguridad sa dakbayan pinaagi sa random check point sa matag Police Station arun mapakgang ang giingong kidnapping sa mga bata. Matud sa director, iimpound diretso ang van unit kung pananglitan di kini makapakita og saktong mga dokumento atol sa ipahigayon na checkpoint tungod posibleng gamit kini sa modus operandi. Dugang pa, gisubay na sa kapulisan ang bag-ohay lamang na giingon tinun-an na gikidnap sa Toril ning dakbayan sa dabaw ug gilayon nila nga hinanaling makapagawas og detalye human sa ipahigayon nga imbestigasyon.
