Nagpasidaan ang Mines and Geosciences Bureau o MGB karong sabado, agosto 8, human misaka ngadto sa 9,096 ka barangay sa tibuok pilipinas ang nameligro sa landslide ug baha.
Kini tungod sa walay hunong nga pag-ulan nga dala sa habagat ug sa nahibiling epekto sa bagyong maymay.
Sumala sa report sa MGB, mao kini ang gidaghanon sa mga barangay nga apektado sa mga nag-unang rehiyon gikan agosto 8 hangtod 11:
Region 1 (ilocos region): 2,933 ka barangay
Region 2 (cagayan valley): 47 ka barangay
Region 3 (central luzon): 1,997 ka barangay
Calabarzon: 1,806 ka barangay
National capital region o ncr: 1,403 ka barangay
Cordillera administrative region o car: 707 ka barangay
Mimaropa: 113 ka barangay
Gipahinumdoman ang publiko nga ireport dayon sa mga lokal nga awtoridad kung adunay mga timailhan sa pagdahili sa yuta, mga liki sa dalan, o kalit nga paglapaw ug pagsaka sa tubig sa mga kasikbit nga suba o sapa.
Dugang pa usab niini, gipasidan-an ang publiko nga maminaw ug mosunod sa mga sugo sa lokal nga kagamhanan, ilabina kung adunay ipatuman nga preemptive evacuation sa mga bukid ug ubos nga mga lugar.
Sa pagkakaron, sumala sa office of the civil defense o ocd, unom na ka tawo ang gikataho nga namatay tungod sa hiniusang epekto sa habagat ug sa mga niaging bagyong luis ug maymay.
