DAVAO CITY – Anaa sa kapin dos syentos ka libo ka mga indibidwal sa Davao Region ang nagpabiling unvaccinated. Kini mismo ang gikumpirma ni Dr. Janis Olavides, focal person of the Covid-19 Vaccination Program sa Department of Health – Davao.
Gikanayon sa opisyal nga miubos ang maong ihap sa mga wala pa nabakunahan tungod sa retargeting sa national level. Subay sa datos sa DOH – Davao, sa target population nga 3,796,830, anaa sa 85.2% o anaa sa 3,234,203 na ang nahimong fully vaccinated.
Laraw karon sa buhatan nga mupahigayon og pagturok sa first dose karong bulana alang sa mga unvaccinated ilabi na ang mga tigulang o senior citizens. Dugang sab ni Olavides nga gipaningkamutan nila nga maabot ang target nga 50% alang sa mga booster doses. Gikumpirma sab sa Davao City Covid-19 Task Force nga nakahatag na og 22.02% alang sa unang booster dose ug 15.85% alang sa ikaduhang booster dose gikan sa naunang booster population as of July 29.
Sa kinatibuk-ang rehiyon, anaa na sa 533,181 ka mga indibidwal ang nagpa-booster as of August 1. Bisan pa man sa pag-taas sa ihap sa mga nagpabakuna, ilang gikanayon nga aduna pay mga bakuna nga hapit na nga ma-expire gumikan sa wala pa kini nagamit busa ginaawhag karon ang matag lokal nga panggamhanan sa rehiyon nga pakusgan pa ang pagdasig sa katawhan nga magpabakuna batok COVID-19.
Via || LJ Florendo
