Nagpadayon ang epekto sa bagyong Kiyapo sa kapin 370,000 ka indibidwal o kapin 80,000 ka pamilya sa nagkalain-laing bahin sa nasud, sumala sa pinakabag-ong report sa National Disaster Risk Reduction and Management Council (NDRRMC).
Kahinumduman, tulo na ka adlaw ang milabay sukad migawas sa Philippine Area of Responsibility (PAR) ang bagyo niadtong sabado sa buntag, Hulyo 25, diin nagbilin kini og grabeng pagbaha ug pagdahili sa yuta sa pipila ka bahin sa Northern Luzon. Sumala pa sa situational report sa NDRRMC karong Martes, Hulyo 28, kapin 6,000 ka indibidwal o labaw 1,500 ka pamilya ang nagpabilin sa mga evacuation center tungod sa epekto sa kalamidad.
Dugang pa niini, nagpabilin sa tulo ang ihap sa mga namatay, nga gikan sa Davao ug Sarangani, samtang usa ka indibidwal ang natala gihapong nawagtang sa Sarangani. Lakip sa mga kadaot nga nahibilin sa bagyo ang 678 ka kabalayan nga naapektuhan sa nagkalain-laing lugar. Sa kasamtangan, nakapaabot na ang gobyerno og kapin ₱20 milyon nga ayuda alang sa mga residenteng naapektuhan isip kabahin sa nagpadayon nga relief ug rehabilitation operations.
