Gipadayag ni kanhi National Bureau of Investigation Director Jaime Santiago nga giagi dayon sa verification ug authentication ang video sa Zoom press conference ni Vice President Sara Duterte kaniadtong Nobyembre 23, 2024, diin gihimo ang kontrobersyal nga pahayag batok nila Pangulong Ferdinand Marcos Jr., First Lady Liza Araneta-Marcos ug House Speaker Martin Romualdez.
Matud ni Santiago, iyang gimandoan ang Cybercrime Unit sa NBI nga susihon ang video ug nakigkoordinar usab sa Meta aron mapamatud-an ang pagka-orihinal niini.Human sa verification, gikanayon sa kanhing NBI chief nga nagtukod sila og task force nga gilangkuban sa mga abogado ug cybercrime experts aron imbestigahan ang maong insidente.
Sumala pa niya, nagpadala ang NBI og mga subpoena ug mensahe ngadto kang VP Sara, apan wala matud pa kini motubag ug mitambong sa duha ka higayon nga gipatawag siya sa ahensya.
Gibutyag usab ni Santiago nga gitanyag sa NBI nga imbestigahan ang giingong mga hulga batok sa kinabuhi sa Bise Presidente, apan wala gihapon, matud niya, motubag ang kampo niini.
Dugang pa, dili niya tan-awong hulga batok kang VP Sara ang gitawag nga “Project Romanov,” ug iyang giingong si Pangulong Marcos ang gitumong sa maong pahayag nga unang nahisgutan ni Davao City Mayor Sebastian “Baste” Duterte.
